គេងមិនសូវលក់ញឹកញាប់ មិនហ៊ានឆ្លុះកញ្ចក់ព្រោះស្បែកមុខស្ងួត ស្រអាប់ និងឡើងមុនមែនទេ? កុំបារម្ភ សាកធ្វើតាមការណែនាំខាងក្រោម ស្បែកមុខរបស់អ្នកនឹងត្រឡប់ទៅសភាពដើម ភ្លឺរលោងមានសុខភាពល្អគួរឲ្យទាក់ទាញវិញមិនខាន។
១. បំបាត់មុនលើមុខសិន
ដាច់យប់ញឹកមិនត្រឹមតែធ្វើឲ្យស្បែកអ្នកស្រអាប់ទេ តែក៏ ឲ្យឈឺក្បាល និងកើតមុនដែរ។ ជាធម្មតាអ្នកតែងលេបថ្នាំដែលមានជាតិអាស្ពីរីនដើម្បីជួយបំបាក់អាការៈឈឺក្បាល។ ឥលូវសាកយកថ្នាំអាស្ពីរីនមួយគ្រាប់មកកិន និងយកទឹកសម្អាតស្បែកមុខបន្តិច (Toner) មកលាយបញ្ចូលគ្នារាងខាប់បន្តិច។ បន្ទាប់ពីលាងមុខស្អាតបាតហើយ យកវាទៅលាបលើកន្លែងកើតមុន ទុក ៥ នាទីសឹមលាងចេញ។ បន្ទាប់មក យកទឹកឃ្មុំមកលាបលើកន្លែងកើតមុន ហើយទុក ១០ នាទីសឹមលាងចេញ។
២. ងូតទឹកត្រជាក់
ងូតទឹកត្រជាក់ល្អចំពោះស្បែក។ វាធ្វើឲ្យស្បែកមានសំណើមឡើងវិញ ធ្វើឲ្យស្បែករលោង និងមានសុខភាពល្អ។ អ្នកអាចងូតទឹកក្ដៅឧណ្ហៗបន្តិចសិន សឹមងូតទឹកត្រជាក់ប៉ុន្មាននាទីចុងក្រោយក៏បាន។
៣. ប្រើម្សៅធ្វើនំកម្ចាត់មុន និងអាចម៍រុយ
វិធីមួយទៀតគឺ ការលាយម្សៅធ្វើនំ និងទឹក។ កូរវាឲ្យខាប់ ក្រោយមកយកមកលាបពេញលើផ្ទៃមុខដូចម៉ាសមុខ។ ទុកឲ្យស្ងួតហើយជូតសម្អាតចេញ។ បន្ទាប់មកអ្នកអាចលាប Moisturizer ដើម្បីផ្ដល់សំណើមដល់ស្បែកមុខ។
៤. ប្រើម៉ាសមុខពីផ្លែឈើ
បើចង់ប្រើវិធីធម្មជាតិ ម៉ាសមុខពីផ្លែឈើអាចជួយបាន។ អ្វីដែលអ្នកត្រូវការរួមមាន ផ្លែប៊ឺទុំពាក់កណ្ដាល ទឹកដោះគោជូរមួយស្លាបព្រា ទឹកឃ្មុំមួយស្លាបព្រា និងត្រសក់ ២ ចំណិត។ លាយបញ្ចូលផ្លែប៊ឺ ទឹកដោះគោជូរ និងទឹកឃ្មុំចូលគ្នាឲ្យសព្វ ហើយយកមកពាសលើផ្ទៃមុខ។ យកត្រសក់ ២ ចំណិតមកបិទលើភ្នែក ហើយទុកចោលរយៈពេល ១៥ នាទី។ បន្ទាប់មកលាងមុខចេញដោយទឹកក្ដៅឧណ្ហៗ។
៥. ប្រើចំណិតក្រួច និងអំបិល
ដើម្បីជៀសវាងកុំឲ្យកោសិកាស្បែកខូច។ អ្នកអាចប្រើចំណិតក្រូចឆ្មាលាយជាមួយអំបិលតិចៗ ហើយយកមកត្រដុសស្រាលៗនៅលើស្បែកមុខ ក្រោយមកលាងមុខចេញនឹងទឹក។
៦. ម៉ាស្សាមុខ
យកពេល ១០ នាទីមកម៉ាស្សាមុខដោយខ្លួនឯងដើម្បីឲ្យដំណើរឈាមរត់ស្រួល និងឲ្យផលិតផលរក្សាស្បែកចូលទៅជ្រៅក្នុងកោសិកាស្បែក។ ដើម្បីឲ្យមានប្រសិទ្ធភាពគួរយក Mosturizer ទៅក្លាសេ សឹមយកមកម៉ាស្សាថ្នមៗនៅលើស្បែកមុខ។
៧. ញ៉ាំ និងគេងឲ្យបានគ្រប់គ្រាន់
អត់ងងុយ ទទួលទានជាតិស្រវឹង និងជាតិស្ករច្រើនធ្វើឲ្យស្បែកស្ងួតអត់សំណើម។ អ្វីដែលរៀបរាប់ខាងលើអាចជួយកែខៃបានច្រើន តែបើចង់ឲ្យស្បែកកាន់តែភ្លឺរលោងឆាប់រហ័សត្រូវគេងឲ្យបានគ្រប់គ្រាន់ និងញ៉ាំបន្លែផ្លែឈើពណ៌បៃតងដែលល្អចំពោះស្បែក៕
0 comments:
Post a Comment