ទំនុកចិត្តក្នុងការប្រាស្រ័យទៅមនុស្សដទៃនឹងថមថយ ប្រសិនបើអ្នកមានអារម្មណ៍ថាខ្លួនឯងមានក្លិនមាត់មិនល្អទាល់តែសោះ។ ក្លិនមាត់មិនមែន ទៅស្រួលហិតដូចទឹកអប់ឯណាលោក? អីចឹងទេ ទាល់តែកែខៃបើដឹងថាមាត់ខ្លួនឯងមានក្លិបមិនស្រួល។ Sabay សូមបង្ហាញវិធីងាយៗ ជួយឲ្យគេចផុតពីបញ្ហាក្លិនមាត់ដូចតទៅ៖
សម្អាតធ្មេញជាប្រចាំ
កត្តាស្នូល២យ៉ាង បណ្ដាលឲ្យមានក្លិនមាត់គឺ បាត់តេរី និងកម្ទេចអាហារជាប់ធ្មេញ។ ការដុះធ្មេញទទេៗ មិនគ្រប់គ្រាន់សោះ។ អ្នកគប្បីកោសអណ្ដាតផងរាល់ពេលដុះធ្មេញ ព្រោះថាអណ្ដាតប្រៀបដូចកម្រាលមួយផ្ទាំងមានជ្រាំងៗ ដែលអាចឲ្យកម្ទេចកម្ទីជាប់ទីនោះបង្កជាក្លិនអាក្រក់ ពេលនិយាយស្ដី ឬបញ្ចេញដង្ហើម។
ប្រើខ្សែរូតធ្មេញ
ចូរឧស្សាហ៍ប្រើខ្សែសូត្ររូតចន្លោះធ្មេញថ្មមៗឲ្យញឹកញាប់។ ប្រសិនមិនធ្លាប់រូតសោះ វាអាចនឹងឈាមតាមអញ្ចាញខ្លះពេលធ្វើលើកដំបូង តែក្រោយៗទៅវានឹងធម្មតា។ បើអ្នកសាកអ្នកនឹងរកឃើញអាថ៌កំបាំងដោយឯកឯងថា ហេតុអីមាត់អ្នកនិយាយទៅមានក្លិបអាក្រក់ ព្រោះរំអេច ឬជួនអីមានទាំងខ្ទុះឈាម ជាប់អញ្ចាញផងនឹងជាប់មកតាមខ្សែរូត។ ថ្នាក់ៗហ្នឹងលៃអីឲ្យមាត់ក្រអូបទៅកើតនោះ?
ប្រើទឹកខ្ពុរមាត់
ទឹកខ្ពុរមាត់ដែលមានលក់នៅផ្សារ អាចឲ្យមាត់អ្នករក្សាបានសំណើម និងការពារក្លិនដង្ហើមបានយ៉ាងល្អ។ ចូរប្រើវា ពិសេសពេលព្រឹក។
ផឹកទឹកឲ្យច្រើន
ព្យាយាមទទួលទានទឹកឲ្យច្រើន ដើម្បីឲ្យមាត់មានសំណើមជាប់។ នៅពេលមាត់ស្ងួត នោះក្លិនមិនល្អនឹងកើតឡើងយ៉ាងងាយ។ មើលតែពេលព្រឹកងើបពីគេងទៅ មាត់យើងមានក្លិនអាក្រក់ណាស់ ព្រោះពេលគេងលក់មាត់បញ្ចេញទឹកមាត់តិចតួចបំផុត។ ទឹកមាត់គឺជាអាវុធសម្លាប់ក្លិនមាត់ ដោយសារវាផ្ទុកអង់ហ្ស៊ីម អាចសម្លាប់បាក់តេរីបង្កក្លិនបាន។
ទទួលទានស្ករកៅស៊ូ
ស្ករកៅស៊ូមានប្រយោជន៍ខ្ពស់ជួយកាត់បន្ថយក្លិនមាត់។ ដូចបាននិយាយខាងលើអីចឹង ពេលទំពា ស្ករកៅស៊ូ នោះទឹកមាត់នឹងចេញមកកាន់តែច្រើន ដែលអាចកម្ចាត់បាក់តេរីអាក្រក់បាន។ ប៉ុន្តែអ្នកគប្បីជ្រើសរើសស្ករកៅស៊ូដែលសក្ដិសម ដូចជាស្ករមានក្លិបឬរសជាតិ ដើមយីហ៊ុប មិនអីចឹងទេ ស៊ីលីតុល ក៏ល្អ។
ញ៉ាំចេកទុំ
មិត្តអ្នកប្រហែលធ្លាប់ដឹងខ្លះ ថាញ៉ាំចេកអាចបំបាត់ក្លិន ខ្ទឹម ឈីស ការកាហ្វេជាដើម។ ប៉ុន្តែការទទួលទានផ្លែចេកក៏មានគុណសម្បត្តិណាស់ ជួយឲ្យអស់ក្ដីបារម្ភក្លិនមាត់ទៀតផង។
ទៅជួបទន្តពេទ្យ
ប្រសិនបើការអនុវត្តវិធីងាយខាងលើនៅតែមិនប្រយោជន៍សោះនោះ អ្នកគួរទៅកាន់មន្ទីរពេទ្យធ្មេញ ដើម្បីព្យាបាល ព្រោះថាប្រហែលមាត់ធ្មេញអ្នកមានបញ្ហា ត្រូវព្យាបាលលើសពីវិធីងាយៗខាងលើហើយ៕
0 comments:
Post a Comment