ជម្ងឺឈឺឆ្អឹងខ្នង! ក្នុងមួយជីវិតមនុស្ស អាចនឹងជួបប្រទះ ដូចនេះ ស្វែងយល់ ពីការថែទាំ វិធីសាស្ត្រ ព្យាបាល និង ការចំណាយ

ភ្នំពេញ៖ ជម្ងឺឈឺឆ្អឹងខ្នង វាផ្តល់នូវអាការៈពិបាក ក្នុងការទ្រាំមិនអន់នោះទេ នៅពេល ដែលឈឺម្តងៗ ហើយតើអ្នកដឹងទេថា វាអាចមានភាគរយ ពី ៥០ ទៅដល់ ៨០ភាគរយ សំរាប់មនុស្សម្នាក់ៗ ក្នុងការប្រឈមមុខ ការឈឺខ្នងនេះ ក្នុងមួយជីវិត របស់ពួកគេ។ តើជម្ងឺ ឈឺឆ្អឹងខ្នងនេះ យើងអាចរកដំណោះស្រាយ ដោយវិធីណា? តើមានការព្យាបាល និង ថែទាំ យ៉ាងដូចម្តេច?
បើយោងទៅតាមប្រសាសន៍ របស់លោក MOHAMAD ZAKI HAJA MOHD AMIN ប្រធានមន្ទីរពេទ្យ ម៉ាកូតា របស់ប្រទេសម៉ាឡេស៊ី ដែលបានធ្វើបទបង្ហាញក្នុង សិក្ខាសាលាមួយ នៅសណ្ឋាគារ ឡឺរ៉ូយ៉ាល់ កាលពីថ្ងៃទី ១២ កក្កដា ឆ្នាំ ២០១៤ នេះ បានឲ្យដឹងថា កាលពី ដើមមក ទាល់តែមនុស្ស មានវ័យចំណាស់ទៅហើយ ទើបអាចពិនិត្យ រកឃើញថា ពួកគាត់ កើតមានជម្ងឺឈឺឆ្អឹងខ្នង ប៉ុន្តែនាពេល បច្ចុប្បន្ន ដោយសារតែ បច្ចេកទេស និង បច្ចេកវិទ្យា ខាងវេជ្ជសាស្ត្រ ខ្ពស់ និង ទំនើប ជាងមុន ទើបមនុស្សមានវ័យក្មេង ក៏អាចរកឃើញ បានដូចគ្នាផងដែរ។
ខាងក្រោម ជាសំនួរចម្លើយ ដែលគួរយល់ដឹង អំពី ជម្ងឺឈឺឆ្អឹងខ្នងនេះ ហើយក៏ជា គោលបំណង របស់សិក្ខាសាលា ដែលសហការរវាង MHTC ជាមួយនឹង មន្ទីរពេទ្យ មកពីប្រទេសម៉ាឡេស៊ី ដើម្បីផ្តល់នូវការយល់ដឹងពី សារៈសំខាន់ បញ្ហាសុខភាព ថាតើត្រូវធ្វើបែបណា ដើម្បីទប់ស្កាត់ ក៏ដូចជា ការថែទាំប្រចាំថ្ងៃ ជូនដល់ប្រជាពលរដ្ឋកម្ពុជា។
តើរោគសញ្ញា នៃជម្ងឺឈឺឆ្អឹងខ្នង បណ្តាលមកពីអ្វី?

• មូលហេតុដែលនាំឲ្យឈឺឆ្អឹងខ្នង មានច្រើន តែភាគច្រើន កើតឡើងដោយសារ គ្រោះថ្នាក់ អ្វីមួយ, វ័យកាន់តែចាស់, មានដុំសាច់ ឬ ដោយសារ មានជម្ងឺឆ្លង ដែលទាំងអស់នេះ សុទ្ធតែជា កត្តាទូទៅ ដែលតែងកើតមានឡើង ហើយក៏នៅមានកត្តា មួយចំនួន ផ្សេងទៀតផងដែរ។

តើមានវិធីសាស្ត្រអ្វី ដើម្បីការពារ?

• ទីមួយ ចំពោះអ្នកដែលកើតមាន ជម្ងឺឈឺឆ្អឹងខ្នងរួចហើយនោះ មិនត្រូវ លើកអ្វីដែលធ្ងន់ពេកទេ និង មិនគួរធ្វើសកម្មភាពអ្វីច្រើន ដែលមាន ការប្រើប្រាស់ រាងកាយច្រើនពេកនោះទេ ហើយម្យ៉ាងវិញទៀត បើសិនជាមានអាការៈឈឺ ត្រូវមានការកែតម្រូវ ចំពោះឥរិយាបថ ឡើងវិញ។ ឧទាហរណ៍ដូចជា របៀបក្នុងការលើករបស់របរ ជាដើម គួរណា ត្រូវលើក ឲ្យបានសមរម្យ មិនប៉ះពាល់ដល់រាងកាយ ហើយ បើសិនជាចង់ ឱនលើកអ្វីមួយវិញ គួរណាស់តែ ធ្វើការបន្ទន់ជង្គង់ចុះ ជាសជាងការឱន។ ក្នុងនោះផងដែរ សំរាប់ពេលណា ដែលយើង អង្គុយវិញ ត្រូវមានទម្លាប់អង្គុយឲ្យត្រង់ ដើម្បីការពារកុំឲ្យវាឈឺកាន់តែខ្លាំង។

ចុះក្នុងករណីដែល សភាពជម្ងឺកាន់តែធ្ងន់ធ្ងរ?

• ពាក់ព័ន្ធនឹងវិធីសាស្ត្រ នៃការព្យាបាល បើសិនជាជម្ងឺឈឺឆ្អឹងខ្នង កាន់តែមានសភាព ធ្ងន់ធ្ងរ យើងត្រូវតែទៅជួប គ្រូពេទ្យ ដើម្បីពិនិត្យ រោគវិនិច្ឆ័យ រកមូលហេតុ ដែលបណ្តាលឲ្យមាន ការឈឺឆ្អឹងខ្នងឲ្យបានត្រឹមត្រូវ។ ហើយការព្យាបាលនេះទៀតសោត ក៏មិនចាំបាច់ ត្រូវតែវះកាត់នោះទេ។ យើងអាចព្យបាល ដោយវិធីសាស្ត្រ ដោយមិនចាំបាច់វះកាត់។ ឧទាហរណ៍ដូចជា ការព្យាបាល ដោយសរីរៈ ឬ ហៅថា ដោយចលនា ឬក៏អាច ប្រើថ្នាំ ដើម្បីព្យាបាល បំបាត់ការឈឺចាប់នោះ បានផងដែរ។ បើសិនជាការព្យាបាល ប្រភេទខាងលើនេះ មិនទទួលបានលទ្ធផលទេនោះ ទើបឈានទៅដល់ ការវះកាត់ ហើយក្នុងនោះ មានការវះកាត់ ពីរប្រភេទ គឺការវះកាត់តូច និង ការវះកាត់ធំ។ ចំពោះការវះកាត់ ប្រភេទណានោះ អាស្រ័យទៅលើស្ថានភាព ដែលធ្វើឲ្យឈឺខ្នង របស់អ្នកជម្ងឺ។

តើជម្ងឺឈឺឆ្អឹងខ្នង អាចប្រឈម នឹងការស្លាប់ដែរទេ?

• ជាធម្មតា មិនបណ្តាលឲ្យមានការស្លាប់នោះទេ លើកលែងតែករណីដែល ការឈឺចាប់ ស្រាប់តែមានការឈឺសន្ធប់ខ្លាំង កើតឡើង ដោយសារតែ កើតមានដុំសាច់ ធំណាមួយភ្លាមៗ ឬ មានជម្ងឺឆ្លងខ្លាំង ក៏អាចបណ្តាលឲ្យស្លាប់ផងដែរ។ យ៉ាងណាមិញ ឱកាស ដែលធ្វើឲ្យស្លាប់ ប្រភេទនេះ មិនសូវជាមាន ញឹកញ៉ាប់នោះដែរ។ ប៉ុន្តែបើសិនជាយើង មិនបានយកចិត្តទុកដាក់ ឲ្យបានល្អទេ វាអាចបណ្តាលឲ្យអ្នកជម្ងឺ ប៉ះពាល់ទៅដល់គុណភាព នៃជីវិតរបស់គាត់បាន ឧទាហរណ៍ដូចជា ឆ្អឹងខ្នងចាប់ផ្តើម មិនអាចទ្រ សរីរាង្គបាន ជើងលែងរឹងមាំដូចមុន ជាដើម ហើយវាក៏អាចធ្វើឲ្យមានបញ្ហា ទៅដល់ប្រព័ន្ធខួរក្បាល បានផងដែរ។

ចុះចំណែកឯការចំណាយ លើការព្យាបាល និង រយៈពេលនៃការព្យាបាលវិញ?

• ពាក់ព័ន្ធនឹងតម្លៃ វាអាស្រ័យទៅតាមប្រភេទ នៃការវះកាត់។ ការវះកាត់ មានពីរប្រភេទ ទីមួយ ត្រូវការវះកាត់ ចាប់វីសជាប់ក្នុងឆ្អឹង (ដាំបង្គោល) ចំណែកមួយទៀត ព្យាបាល ដោយការ វះកាត់ធម្មតា និង មិនបាច់ចាប់វីសនោះទេ។ ភាគច្រើន អស់ថ្លៃ ឬ ថោក អាស្រ័យ ទៅលើ ការចាប់វីស (ដាំបង្គោល) នេះតែម្តង។ បើសិនជាវះកាត់ អត់មានការចាប់វីស នោះទេ តម្លៃប្រហែលជា ៣ពាន់ដុល្លារអាមេរិក ហើយបើសិនត្រូវការ ចាប់វីស អាចឡើងទៅដល់ ១ម៉ឺនដុល្លារអាមេរិក និងអាស្រ័យទៅតាម បង្គោលនោះ ជាកំរិតបង្គោលប្រភេទអ្វី។ ក្រៅពីនេះ ត្រូវចំណាយ លើថ្លៃ សំរាកព្យាបាល នៅមន្ទីរពេទ្យបន្ថែមទៀត។ នៅមន្ទីរពេទ្យ បើវះកាត់ធម្មតា ត្រូវសំរាកពីរថ្ងៃ  តែបើមានចាប់វីស ជាបង្គោលនោះ ត្រូវការសំរាក ៥ថ្ងៃ ដូច្នេះហើយ តម្លៃនៃការសំរាក ក៏ជាកត្តាមួយ ដែលធ្វើឲ្យការចំណាយ មានការប្រែប្រួល ទៅតាមនោះដែរ៕

[ យល់ដឹងបន្ថែម៖ ទម្លាប់អាក្រក់ទាំង៨យ៉ាង អាចបណ្តាលអោយឈឺខ្នងបាន ]