តើ​ការបរិភោគ​ផ្លែឈើ​ក្រោយ​ពេលបាយ​ល្អ​ដែរ​ឬទេ​?

​តាមរយៈ​ការសិក្សា​ស្រាវជ្រាវ​បាន​បង្ហាញអោយឃើញថា អ្នក​គួរតែ​បរិភោគ​ផ្លែឈើ​តែឯង នៅពេល​ពោះ​ទទេ​ទើប​ល្អ​។​នេះ​គឺ​ដោយសារ​តែ​នៅ​ពេល​អ្នក​បរិភោគ​ផ្លែ​ឈើ​តែ​ ឯង ដោយ​មិន​មាន​អាហារ​ផ្សេង​ទៀត​មក​លាយឡំ វា​ធ្វើអោយ​ដំណើរការ​រំលាយ​អាហារ​ធ្វើការ​បាន​លឿន​ល្អ​។​ចំណែកឯ​ជាតិ​ស្ករ​ ដែល​មាន​នៅក្នុង​ផ្លែឈើ ក៏​ត្រូវ​បាន​ស្រូប​យក​ទាំងស្រុង​ដោយ​រាងកាយ​របស់​អ្នក​។​នៅពេល​បរិភោគ​ ផ្លែឈើ​តែឯង​ក្រពះ​របស់​អ្នក​កាន់តែ​ងាយស្រួល​ធ្វើការ ក៏​ដូចជា​ធ្វើអោយ​ពោះវៀន​ស្រួល ក្នុងការ​ស្រូប​យក​សារធាតុចិញ្ចឹម​ដែល​មាន​ដូចជា​ជាតិ​សរសៃ​និង​ជាតិ​ស្ករ​ ផងដែរ​។​នេះ​គឺជា​វិធី​ដ៏​ត្រឹមត្រូវ និង​ល្អ​បំផុត​ដើម្បី​ទទួលបាន​អត្ថប្រយោជន៍​ពី​ផ្លែឈើ​ដែល​អ្នក​បរិភោគ​។​ ប្រសិនបើ​អ្នក​បរិភោគ​ផ្លែឈើ​ក្រោយ​ពេលបាយ​រួច ជាពិសេស​បន្ទាប់ពី​ការ​បរិភោគ​អាហារ​ដ៏​ច្រើន​មុខ វា​នឹង​ធ្វើអោយ​ក្រពះ​ចំណាយពេល​យូរ​ក្នុង​ការរំលាយ​អាហារ ចំណែកឯ​ពោះវៀន​វិញ ក៏​ពិបាក​ក្នុងការ​ស្រូប​យក​សារធាតុចិញ្ចឹម និង​វីតាមីន ដែល​មាន​នៅក្នុង​ផ្លែឈើ​ដែរ​។ ហើយ​នេះ​គឺជា​ការខាតបង់ ទោះបីជា​អ្នក​ខំប្រឹង​បរិភោគ​ផ្លែឈើ​ច្រើន​យ៉ាងណាក៏ដោយ​៕